Qaanaami matusinermut akerliusut amerliartorput
Naalakkersuisut sapaatip akunnerani kingullermili Qaanaami imigassamik matusinerannut akerliunerminnik nalunaaruteqartut amerliartuinnarput.
Danskeq filminik ilitsersuisartoq Karen Littauer Qaanaameereerlunilu Qaanaarmiut imernerarlugit meeqqaminnillu sumiginnaanerarlugit danskit nutaarsiassaqartitsivii aqqutigalugit saqqummiussereersorlu, Naalakkersuisut Qaanaami imigassamik tuniniaaneq sisamanngormat matuaat.
Imigassamillu matusineq Qaanaami innuttaasunit kommunalbestyrelsemilu ilaasortaasunit nunatsinnilu qinikkanit allanit aqqutissaasorineqanngilaq.
Qaanaami kommunalbestyrelsimi ilasortanit erseqqissaatigineqarpoq suliniutit ingerlalluareersut imigassap matoqqariarluni ammaqqinneratigut ajorsisarnerat misilittagaqarfigineqartoq. Naalakkersuisut aalajangiinerat pakatsinartuusoq Qaanaap isumaginninnermut ataatsimiititaliaani siulittaasoq Niels Qujaukitsoq oqarpoq. Niels Qujaukitsup aarleequtiginerarpaa imigassaq ammaqqippat ajornartorsiutit aallaqqaataaninngaanniit aallarteqqissasut, tamatumunngalu Qaanaami Pilersuisup aqutsisua Mathæus Johansen isumaqataavoq.
Qaanaami imigassaq matummat aanngajaarniutinik allanik atuisoqalernissaa politiinit aamma ernummatigineqarpoq.
Inatsisartuni ilaasortat arlallit Qaanaami imigassamik matusinermut aamma apeqqusiipput.
Illuatungiliuttut Inuit Ataqatigiit Demokraatillu isumaqarput matusineq aqqutissaanngitsoq.
Siumumeersoq Ruth Heilmann piumasaqarpoq Naalakkersuisut matusisimanertik pilersaarutaasullu pillugit nassuiaateqartariaqartut. Tassungalu Inatsisartuni ilaasortaqataa parteeqataalu Agnethe Davidsen isumaqataavoq. Atassummeersoq Kristian Jerimiassen isumaqarpoq Qaanaami imigassamik matusineq ajortumut sangutitsiinnassasoq.
Siumukkormiu alla Kim Godtfredsen matusinermik akerlerinnittoq uparuaasut ilagaat. Taanna isumaqarpoq
Qaanaami matusineq illuinnaasiornerusoq, imatullu tunngaviusumik nuna tamakkerlugu suliniuteqarnissamik erseqqissumik oqariartuuteqarnani.
