Qaanaami imigassamik killilersuigallalerneq kommunalbestyrelsep naammaginngilaa. Suliniutit ingerlalluareersut imigassap matoqqariarluni ammaqqinneratigut ajorsisarnerat misilittagaqarfigereeramikku Naalakkersuisut aalajangiinerat pakatsissutigalugu, Qaanaap kommunalbestyrelseani isumaginninnermut ataatsimiititaliami siulittaasoq Niels Qujaukitsoq oqarpoq.
- Uanga pakatsissutigivara taamatut aalajangiisoqarsimanera tusarlugu – aarleqqutigigakku uani imigassaq matoqqasinnarluni ammarpat tassani ajornartorsiutit aallaqqaataaninngaanniit aallarteqqinnissaat, soor siorna taamaattarsimasoq, kommunalbestyrelsemi ilaasortaq nangippoq.
- Imigassaq siornatigut matoqqariarluni ammaqqikkaangat erngunnersuaq aallartittarami, tassalu tassani ajornartorsiut annertoorujussuusarpoq, soorlu meeqqat sumiginnakkat amerlanerulersarlutik aalakoornerillu kinguneranik piliat amerlanerulersarlutik.
Niels Qujaukitsoq aamma oqarpoq kommunemi suliniut 2004-mili aallartittoq, tassalu ilaqutariinnik sullissineq ingerlareersoq imigassartorpallaalernikkut qatangiinnarsinnaasoq.
- Misilittakkat tamanna takutereerpaat. Qangaaniilli pissutsit taamaattarnikuummata uanga isumaqarpunga ajornartorsiutit ajorsissasut imigassamik matuseqattaartoqalerpat, Niels Qujaukitsoq, Siumut sinnerlugu Qaanaap kommunalbestyrelseani ilaasortaq oqarpoq.