Qaammataasiaq nakkariartortoq
Qaammataasiaq tonsinik qulingiluanik oqimaassusilik februaarip naajartulernerani marsilluunniit qaammaataata aallartisimalaalernerani nunarsuarmut nakkassangatinneqartoq, USA-mi sillimaniarnermik suliaqartut ilimagaat.
- Qaammataasiat amerlasuut ukiut ingerlanerini nunarsuatsinnut nakkartaannarput, nunarsuarmilu ajoqusiissanatik. Qaammataasiap nakkariartornerani sapinngisamik ajoquusiivallaannginnissaa sulissutigaarput, oqaaseqartartoq Gordon Johndroe TV-qarfimmut CNN-imut oqarpoq.
Qaammataasiaq nunarsuarmit 275 kilometerinik avasitsigisumi nunarsuatsinnik kaaviivoq, qaammatillu ataatsip ingerlanerani kilometerit 20-t missaanni nakkariartorsimalluni.
Nunat assigiinngitsut oqartussaasui qaammataasiaq pillugu ilisimatinneqartartut aterminik taaserusunngitsoq CNN-imut oqarpoq.
Qaammataasiani nakkarnikuni NASA-p qaammataasiaa Skylab maannamut oqimaannerpaavoq, taanna 78 tonsinik oqimaassuseqarluni Indiap Imavissuanut Australiallu kippasissortaanut 1979-imi nakkarpoq.
