Qaammataasat misissuinialerput

Qaammataasat tallimat Nunarsuarmilu alapernaarsuiffiit 20-nit ikinnerunngitsut arsarnerit paasiuminaatsortaannik paasiniaasussanngorput – arsarnerit taakkua kusanartorsuit qanorukua paasisariallit?

Qaammataasat tallimat nunarsuarmik kaaviisussanngorlugit februaarip ulluisa 15-ianni aallartinneqassapput – taakkua suliassaraat sananeqaatit mikisuarannguit innaallagiartaqartut seqinermeersut, aammalu Nunarsuup kajungerisaqarfiata akornanni sunniuteqaqatigiittarnersut pillugit, paasissutissanik katersinissaq.

Canadian Space Agency suleqatitik amerikamiut NASA-miittut suleqatigalugit suliassatut pilersaarummi isumaginnittuupput. Nunarsuarmiit alapernaarsuiffiit amerlanersaat Canadap issittortaani inissisimapput.

- Taamatut pisoqarnissaa uatsinnut pissanganartorujussuartut pisussaavoq – tamanna silaannarsuarmi akornusersuutinik tamakkuninnga kusanarlutillu pissaaneqaqisunik uatsinnut paasissutissiissaaq, fysikimi professori, Eric Donovan, Canadamiut pilersaarummut aqutsisuat, oqarpoq.

Arsarnerit takku kusanassusianinngarnit NASA-mi soqutiginninneq tigussaaneruvoq. Sananeqaatit mikisuarannguit arsarnernik pilersitsisartut avataarsuani anorersuarnut annikinnerusunut pilersitsisartutut pasineqartarput – ataatsimoorlutik avataarsuani anorersuarnik annertunerujussuarnik pilersitsisartutut, avataarsualiartaaatit sammiviannik allanngortitsisinnaasunik avataarsualiartartullu inuunerannik navianartorsiortitsisinnaasunik.