Qaammataasamit assilisat atorlugit nunarput assilioraat

Atorfillit ilisimatusarsimasullu Kinameersut Nunatsinneeqqammerput Kinamiilllu Nunatsinnut tunissutit, tassa Nunatta qaammataasamiit assingi tunissutigineqarlutik. Pinngortitaleriffik tusagassiuutinut taama ilaatigut allaaserisaqarpoq.

Assit katillutik 108-pput, qaammataasamit LANDSAT 8-meersuullutik. Assit pineqartut katiteraanni Nunarput tamakkerluni assilinera takuneqarsinnaavoq, assillu 2014-ip 2015-illu aasaanerani assilisaallutik.

Assit qaammataasameersut pilersinniarneqarnerat ajornakusoortuusinnaasoq Pinngortitaleriffiup ilisimatitsissutigaa, sorpassuimmi iluatsilluarnissaat pisariaqarpoq, soorlu aamma sila assiliiniarnerup nalaani ajunngittariaqarluni.

Assi © : Pinngortitaleriffik

Professor Qiang Zhou Shanghai Academy of Agricultural Sciences-imeersup, tassa Shanghai-imi nunalerinermik ilisimatusarfimmeersup, nunap assingi Pinngortitaleriffimmeersumut Karl Zinglersenimut tunnuippai. (Asseq: Pinngortitaleriffik)

Qaammataasaq Nunarsuatsinnik ullut 16-it ingerlanerani kaajallaasarpoq, sarsunneratalu nalaani sila pitsaavallaarsimanngippat ullut 16-it aamma utaqqisoqartariaqassalluni.

Immikkut ilisimasallit Kinameersut kalaallinik suleqateqarsimanertik soqutiginartutut nalilerpaat:

- Soqutiginnittorujussuuvugut, ingammik sermersuup aakkiartorneranik malinnaalluarnissarput pingaaruteqaqimmat, Kinammi imartaata qaffasissusia toqqaannartumik sunnersimaneqalereermat. Nunarsuarput tamarmi ataqatigiippoq, taamaammallu Issittumi allanngoriartuutit Kinamit soqutigineqarlutik malinnaaffigineqaqqissaarneqarput, Beijing Normal Universityp rIssittumi Imaanullu tunngatillugu ilisimatusarfeqarfiani pisortaq Xiau Cheng oqarpoq.

Immikkut ilisimasallit Nunatsinneersut Kinameersullu siunissami suleqatigeeqqissinnaanissaat mattunneqanngilaq. Imaatami pissusianik immallu sikuata siaruarsimaneranik ilisimatusaateqaqatigiissinnaanerit periarfissatut ilaatigut taaneqarput.