Qaammat inoqarfiliorfigineqassaaq
Amerikamiut silaannarsualiartarnermut ingerlatsiviannit, NASA-mit, oqaatigineqarpoq, qaammammi inoqarfimmik aalajangersimasumik 2020-mi pilersitsinissamik pilersaaruteqartoq.
Inunnik Marsiliartitsinissamut qaammammi inoqarfik piareersarfiussaaq.Ukiut 34-t qaangiussimalerput USA-p silaannarsualiartitsisarnera Apollo-mik taaguutilik unitsinneqarmat. Maanna Amerikamiut silaannarsualiartaatinik sanaartorniarput, piffissami sivisuumi silaannarsuarmiissinnaasunngorlugit suliaasunik.
Silaannarsualiartitseqatigiiffimmit oqaatigineqarpoq, Amerikamiut 2020-mi avataarsualiartitsisarneq aallarteqqippassuk qaammammi inoqarfiliornissaq pilersaarutigineqartoq, tamannalu præsident Buship ukiut pingasut matuma siornagut oqaatigeernikuuaa.
Takorloorneqarpoq 2024-mi qaammammi inoqarfeqalissasoq biilimillu qaammammi angalaarutaasinnaasumik ineriartortitsisoqassasoq, 2027-imiit qaammammi ilisimasassarsiorluni angalaarsinnaasussamik.
Qaammatip sukumiinerusumik misissuiffigineqassaaq silaannarsualiartaammillu inuttalimmik Marsimukartitsinissaq siunissami pilersaarutinut aamma ilaavoq.
USA-p naalagaaffiata NASA-mut ukiumut aningaasaliissutigisartagaasa 100 milliard koruuniusut iluanni pilersaarutip piviusunngortinneqarsinnaanissaa neriuutigineqarpoq.
