Qaakkut tusarnaartitseqqinnissaannut billetit nungupput
Per Berthelsenip nipilersoqatigiivi Qaaq immikkut ittumik unnugu kulturip illorsuani Katuami tusarnaartitseqqissapput. Immikkut tusarnaartitsinissaq marlunngornermi ualikkut nalunaarutigineqarpoq. Tassalu billetit 500-ut ullut pingasut ingerlanerinnaanni nungunneqarput.
- Ullumikkut aamma billetisiniaraluartut arlallit takkupput, Katuami filmertarfimmi pisortaq Bill Bering KNR.gl-mut oqarpoq.
Qaaq 1983-mi nuussuarmik saqqummersitsipput qulequtserlugu 'Timmissatut ilillunga' tallimanngormallu kingullermik tusarnaartitsinissartik sioqqullugu taanna tusarnaartitsissutigisimanngisaannarlugu. Tassani billetit nungunneqarput arfininngormallu aamma tusarnartitsinermi billetit nungunneqarlutik arlallit nunguussaallutik. Taamaammat Katuaq aamma Qaaq aalajangerput immikkut ittumik unnugu tusarnaartitsisoqassasoq tusarnaariarnissamut nunguussaasorpassuit aamma periarfissinniarlugit.
