Puttaarujussuaq kaanngaqqajaavoq
Avatangiisit pillugit Europami qaammataasaq, Envisat, atorlugu pingasunngormat assilisani takuneqarsinnaavoq, puttaarsuaq, Wilkinsip puttaavanik taaguuserneqarsimasoq, ima qulloortigisimasoq puttaaq Issittup qeqertaasartaata kippasissuaniit nunavimmit kaanngariaannaalluni.
Wilkinsip puttaava qanoq qulloortiginersoq ilisimatuut qaammataasakkut februaarimili assilisani takusinnaalersimavaat.
Puttaat nungukkiartornerannut pissutaasorineqarpoq tamaani silap pissusaata allanngoriartornera, taamalu sukkatigisumik aakkiartussappata navianartorujussuussaaq.
- 1990-ikkut aallartilaarneranni siulittuutigaarput Wilkinsip sikua ukiut 30-t ingerlaneranni nungukkumaartoq, taamaaliorattali qanganisarpaluppallaarsimavugut. Eqqoriaanitsinnit sukkanerujussuarmik aakkiartorpoq, tuluk Issittoq pillugu ilisimatooq, professor David Vaughan, oqarpoq.
Puttaarujussuaq alla, Larsen B-mik taaguutilik, Amerikap Kujalliup kujasissuani Issittup qeqertaasartaata imartaani nallorluni immamut 2002-mi siaruaatitillarmat nunarsuaq tamakkerlugu maluginiarneqarpoq.
