Putinip gassit aqqutaannik aserorterisoqarnera peqqarniisaarniarnertut taagaa

Ruslandip præsidentiata Vladimir Putinip Tyrkiap præsidentia Recep Tayyip Erdogan oqarasuaatikkut oqaloqatigigamiuk Østersømi gassit aqqutaasa Nord Stream 1-ip aamma 2-p putuneqarnerat nunani tamalaani peqqarniisaarniarnertut taavaa.

Ruslandip naalakkersuisuisa nalunaarutaat nutaarsiassaqartitsiviup Reutersip issuarpaa.

Piaaraluni aserorterisoqarneranik taallugu Putinip oqaluttuarisaanermi aatsaat pisoqartoq oqaatigaa, nunanilu tamalaani peqqarniisaarniarnertut taallugu.

Vladimir Putinip oqaaseqartitaata Dmitrij Peskovip gassit aqqutaasa putunerat peqqarniisaarniarnertut ippassaq sisamanngornermi taavai.

Gassit aqqutaasa putusimanerat ataasinngormat marlunngormallu paasineqarmat Danmarkimi Sverigemilu oqartussat oqaatigaat ajutoornerunngitsut. Piaaraluni iliuuseqartoqarsimavoq, taakku oqarput.

AAMMA ATUARUK CO2 aniasoq Danmarkip ukiumut aniatittagaata 32 procentiatut annertutigisoq

Kikkulli taamaaliorsimanersut Danmarkip Sverigellu taamaattoq eqqarsaatersuutiginianngilaat.

Ruslandip gassit aqqutaannik aserorterisuunera Dmitrij Peskovip pingasunngormat ilumuunnginnerarpaa.

- Pisuutitsiniartoqannginnerani gassit aqqutaasa putuneqarsimanerat misissuivigineqaqqaartariaqarput. Qaartoortoqarsimanersoq qaartoortoqarsimannginnersorluunniit misissorneqartariaqarluni, Putinip oqaaseqartitaa oqarpoq.

Taassuma USA pisuutippaa. Amerikamiummi suliffeqarfiutaasa gassimik Europamut tunisaqarneranni iluanaaruteqangaatsiarnerarpai.

Gassit aqqutaasa ajoquserneqarnerat eqqartorniarlugu Naalagaaffiit Peqatigiit Isumannaallisaaniaqatigiivi New Yorkimi ullumi tallimanngornermi ataatsimiissapput. Rusland matumani ataatsimiigiaqqusisuuvoq.