Putin-imut akerliusut akerliussutsimik takutitseqqusaanngillat

Moskva-mi akerliussutsimik takutitsisut 200-ingajaat russit politiiviisa tigusarivaat. Tigusarineqartut ilagaat, siornatigut, nunarsuarmi skak-erluni pissartaasimasoq Gary Kasparov, Ritzau allappoq.

Kiffaanngissutsimik pisinnaatitaaffiit killersorneqarnerat Præsident Vladimir Putin-imullu naammagittaalliornerit akerliussutsimik takutitsiniarnermi tunngaviusimapput.

Politiit naalagaaffimmilu pissutsinut ministeriaqarfiup sakkutuuvi tuusintilikkaat akerliussutsimik takutitsisunik unititsiniaasimapput, illoqannginnersami Pusjkin-imi katersuuteqqusaaffiunngitsumi katersuussimasunut.

Kasparov-i naalakkersuisunut illuatungiliuttut partiianni, Et Andet Rusland-imi aqutsisunut ilaavoq taannalu, politiinit tigusarineqarsimavoq. Kingornatigut nutaarsiassaqartitsiviup Itar-Tass-ip nalunaarutigaa, Kasparov iperaagaasimasoq, kinguninnguatigulli politiit oqaaseqartartuinit iperagaasimannginnerarneqarluni.

Danmarks Radiop tusagassiortuata Jan Jakob Florianip ilanngutassiamini oqaluttuaraa, præsident Putin-imut tapersersuisut akerliussutsimik takutitsinermi Pusjkin-imi katsersuussinnaasimasut, illuatungiuliuttulli tassani katersuullutik akerliussutsiminnik takutitsiniarnerat akuerineqarsimanngitsoq. Akerliussutsimik takutitsiseqataasut ilagisimavaat naalakkersuisunut illuatungiuliuttut siuttuat Mikael kasjanov, siornatigut Rusland-imi naalakkersuisunut siuttuusimasoq, Putin-ilu ikinngutigiikkunnaanerisigut tunuarsimasoq, tigusarineqangajalluinnarsimavoq, uippakajaartoqarneratigullu qimaasinnaasimalluni. Mikael kasjanov Jan Jakob Florian-imut oqaluttuarpoq, Rusland-imi pisortat illuatungiliuttunut pissusilersornerat nunarsuarmioqataasunit maana takuneqarsinnaasoq, inatsisartunut præsident-imullu qinersisoqalinnginnerani.