Putin ernumassutissaqanngilaq
Ullumikkut Amerikamiut præsidentiat Bush nalunaaquttap akunnialunnguisa ingerlaneranni marlunnik assigiinngilluinnartunik oqalugiarpoq. Siullermik inussiarnersumik Ruslandi oqarfigaa Amerikamiut Europami qaartartunut illersuusiorniarneranni ersissutissaqannginnerarlugit.
Kinguninnguatigut oqalugiarnermini allatorluinnaq oqalugiarpoq Ruslandillu præsidentia Putin isornartorsiorujussuarlugu, oqarluni Putin-ip iluarsaaqqinnera ajutoorsimasoq.
Aallaqqaammut Bush Pragimi tusagassiortunik katersortitsinermi inussiarnisaarpoq Ruslandilu eqqissisimaqqullugu, oqarluni Ruslandi ersissutissaqanngitsoq, naak USA qaartartunik igeriuttakkanik Polenimut inissiiniarluni aamma Tjekkiami radarinik inissiiniarluni pilersaaruteqaraluartoq, tassa qaartartunut illersuusiornerminut atatillugu.
- Sakkutuuit naalagaat ilisimatoortatillu qaartartunik illersuusiassap qanoq ittuuneranik takuniaatinniakkit, Ruslandi akerarinngilarput, George Bush oqarpoq.
Ilanngullugu oqaatigaa sapaatip akunnerani matumani Putin naapikkuniuk nassuiaanniarlugu qaartartunut illersuusiassaq Ruslandimut sammitinneqanngitsoq.
Nalunaaquttap akunnialunngui qaangiummata Bush demokrati isumannaatsuunissarlu pillugit ataatsimeersuartuni allatorluinnaq nipeqarluni oqalugiarpoq.
- Ruslandimi iluarsaaqqinnerit innuttaasut sunniuteqarnerunissaannik neriorsuutaasut ajutoorluinnarsimapput, tamannalu tamat oqartussaaqataanerisa ineriartortinneqarneranut ajornartorsiutaavoq, Bush oqarpoq. Kina aammattaaq taama oqaatigineqarpoq.
Amerikamiut præsidentiat oqarpoq, ikinngutigiit akornanni ajornartorsiutit ammasumik oqaluuserineqartartut, taamaattumik USA-p Ruslandimut Kina-mullu attaveqarnini annertusarniaraa, taamaattorli tamat oqartussaaqataanerisa tunngavigineqarnerat pingaassusiallu puigorneqassanngitsut.
Ruslandip USA-p Europami qaartartunut illersuusiorniarnera narrutsaatigeqaa. Putinip tamanna sorsunnerup nillertup eqquteqqinneqarneranik taavaa oqarlunilu Ruslandi qaartartunik igeriuttakkanik Europap tungaanut sammisunik inisseeqqittariaqassasoq.
Bush aamma Putin nunat pisuunerpaat G8-mik taaneqartartut aqagu ataatsimeeqatigiilerpata naapittussaapput.
Bush unnugu Tysklandimut ingerlaqqissaaq aqagulu ullaakkut tyskit kansleriat Angela Merkel ataatsimeeqatigissavaa nunat G8-mik taaneqartartut ataatsimeeqatigiilinnginnerini.
