Putin ataatsimeeqateqareernermi: Syriami sorsukkunnaartoqassaaq
Tyrkiap præsidentia Recep Tayyip Erdogan qaaqqusisoralugu Putin Iranillu præsidentia Hassan Rouhani Tyrkiami ataatsiminneranni Putin taama oqarpoq:
- Oqaloqatigiinnitta inerititaqarluarnissaat upperaara, Syriamilu aaqqiagiinngissutsit aaqqiivigineqarnissaat pillugu isumaqatigiissusiorsinnaassasugut, Putin oqarpoq.
- Eqqisseqatigiittoqarnissaa, nunallu isumannaatsunngornissaa kissaatigaarput, nunallu nukittorsarnissaa aamma anguniarlutigu, Ruslandip præsidentia oqarpoq.
Nunat pingasut taakku, Syriami sorsuttoqarneranut ukiuni kingullerni akuunerpaasimasut, Tyrkiap illoqarfiisa pingaarnersaanni Ankarami ataasinngornermi ataatsimeeqatigiipput.
Idlibimi eqqisseqatigiittoqarnissaa sulissutiginiaraat
Nunat pingasut siuttui tusagassiortunik kingorna katersuutsitsipput. Syriamilu nunap immikkoortuani Idlibimi eqqisseqatigiittoqarnissaa pillugu ataatsimoorullugu oqaaseqaat saqqummiullugu.
Idlib tassaavoq Syriap immikkoortuisa akornanni pikitsitsiffiusuni kingullersaat. Syriap præsidentianut Bashar al-Assadimut akerliusut tassani pikitsitsisuupput.
Saudi-Arabiami uuliamik tunisassiorfiit angisuut marluk sapaatip-akunnerata naanerani saassunneqartut tusagassiortunik katersuutsitsinermi aamma eqqartorneqarput.00:01:59
Iran saassussinermut peqataasoq, USA-p pasilliutigaa. Iranilli tamanna ilumuunnginnerarpaa, Saudi-Arabiami pikitsitsisut Houthit saassussisuunerarlugit.
