Pulaarfik aningaasanik katersaqarluarpoq

Pulaarfik aqqutigalugu katersisoqarmat suliffeqarfiit, peqatigiiffiit inuillu ataasiakkaat aningaasanik tunisipput. Nalunaaquttap akunnerata ataatsip ingerlanerani aningaasat 357.000-it koruunit katersorneqarput.

Haitimi nunap sajunneranik eqqugaasut ikiorniarlugit Brugsen aamma katersinialerpoq. Pisiniat karsimi akiliinialersut 30-t koruuninik ullumimiit tunissuteqarsinnaalissapput. Aningaasat tunissutigineqartut nerisassanut, nakorsaatinut, toqqinut tippinullu atorneqassapput.

Haitimiunut katersinissaq Kalaallit Nunaanni Brugsenini ulluinnarni aqutsisunit aalajangerneqarpoq:

- Katersinissaq inassutigaarput, pisisartuvut ilaasortavullu aningaasaliinissamik periarfissikkumallugit ajunaarnersuup kinguneranik ikiuinissamut Kalaallit Røde Korsiata aaqqissuusinera taperserlugu, KNB-ip siulittaasua, Ole Mølgaard Motzfeldt, Sermitsiaq.ag-mut oqarpoq.