Pujortartaruit pilatsissinnaanngilatit
Pujortartaruit pilatsissinnaanngilatit. Tuluit Nunaanni pujortartartut perulorujussuanngitsut taama oqarfigineqartarput.
Pujortartartut pilallugit akisoorujussuusarmat taama oqartartoqartalerpoq.
Tuluit Nunaani sipaarniartoqarnera pissutigalugu peqqinnissaqarfinni tallimani allaffeqarfiit qanittukkut illoqarfimmi Norfolk-imi kattunneqarput. Qitiusumik allaffeqarfimmit innuttaasut 800.000-t missaat kiffartuunneqartarput. Allaffeqarfik aningaasarliornermik sipaarniartulussuuvoq. Tamanna tunngavigalugu pujortartartut seeqqulersinniartut imaluunniit siffialersinniartut sipaarniarfigineqarput.
- Pujortartartut pingasoriaammik kingunerlutitsinissaminnut qaninnerusarput, ikii mamikkumaartaarnerusarput, aseruuttuukkajunnerusarput taqqamigullu milittuukulanerusarlutik. Pilatsereernerminnilu sivisunerusumik akisoqisumillu uninngasariaqartarput, allaffeqarfimmi pisortaq oqarpoq.
Pujortartartut pilatsinnatik pujortartarunnaarnissaminnik neqeroorfigitittarput. Iluatsikaangamikkulu aatsaat utaqqisut allattorsimaffiinut allatseqqittarlutik. Pujortartarunnaarniarlutik sunik misiliisarsimanersut qanorlu pilatsinnissaminnik pisariaqartitsiginersut misissuisoqartarpoq. Peruluttut pujortartartuunerat apeqqutaatinnagu pilanneqartarnerat erseqqissaatigineqarpoq.
Nakorsat, peqatigiiffiit assigiinngitsut pujortartartullu pujortartartunik immikkoortitsineq avoqqaarliutigaat. Nakorsat misilittakkatik naapertorlugit nalunaarput pujortartartut amerlanersaat pujortarunnaarusukkaluarlutik ilungersuuteqareersut qalleqqissarneqaqqittut. Pujortarneq ajortut peqatigiiffiannit nalunaartoqarpoq tamanna pinngitsaaliiniarnerusoq. Taakkualu tupamut akiitsuutit aqqutigalugit pujortartartut kikkunnit tamanit akileraaruteqarnerusartut erseqqissaatigaat. Tamannalu peqqutigalugu allatuulli pineqartariaqarnerat kissaatigineqarluni.
Innuttaasut arlallit nakorsat allagartartaarnerminni neriorsuisinneqarnerat apeqquserpaat, tassanimi innuttaasut assigiimmik peqqissutsimikkut ikiortariallit ikiorniarlugit nakorsanngortut neriorsuisarput.
