Pujortartarneq meerartaarniarnermut ajoqutaasarpoq
Anaanaasoq pujortartarpat, meeqqat meerartaarniarnerat ajornakusoornerusarpoq. Aamma anaanaq naartulinnginnermini pujortartarsimagaluarpalluunniit, napparsimmavissuarmit Rigshospitalimit misissuinerit nutaat tamanna ersersippaat.
septembarip 08-at 2010 06:57
Taamaammat arnat naartulinnginneranni Danmarkimi Juumuut Peqatigiiffiannit oqaloqatigineqartalissapput. Danmarkip Radioata nittartagaani tamanna atuarneqarsinnaavoq.
- Pujortarunnaarnissaat pillugu oqaloqatigisarsinnaavavut, Peqatigiiffimmi siulittaasoq, Lilian Bondo, oqarpoq.
Taanna isumaqarpoq, erninissamut siunnersuinermut atatillugu pujortarunnaarnissamut kursusernissaq ilaasalersuuppat, arnat pujortarunnaarnissaat immaqa ajornannginnerussagaluartoq.
- Angajoqqaanngortussammi meerassaminnut ajunnginnerpaamik iliorusuttarput, Lilian Bondo oqarpoq.
Danmarkimi arnat naartusut quliugaangata ataaseq pujortartarpoq. Nunatsinni qanoq amerlatiginersut ilisimaneqanngilaq.
