Pujortartarneq akioruk 30.000-nillu pissarsillutit
Meeqqat atuarfiini akullerni atuartunut unammisitsineq ukiuni siuliini pisareersoq maanna kingumut unammiffiusussanngorpoq. Naalakkersuisoqarfimmiillu neriuutigineqarpoq atuartut pujortartarnerup ulorianassusaa pillugu paasisaat siunissami peqqinnissaq eqqarsaatigalugu sunniuteqarluarumaartut.
- Atuartut klassikkaarlutik suliassamut pilersaarusiussapput. Pilersaarusiornermilu klassimi pujortartartoqannginnissaa qulakkerniarlugu pilersaarusiussapput. Neriunarporlu pujortartarnerup ulorianartui, sunniutigisinnaassaallu paasisaqarluarfigalugit pissarsiaqarfigalugillu pujortartalersinnaaneq pinngitsoortissinnaagaat. Ilisimaneqarpormi ukiukilluni pujortartalerneq kinguneqarlussinnaasartoq, Kathrine Tronhjem, peqqinnissaq pillugu siunnersorti taama oqaluttuarpoq.
Klassit pilersaarusiornerminni naatsumik ersarissumillu allaaserissavaat klassip iluani pujortartartoqarsimappat tamanna qanoq unitsinneqarnersoq, kiisalu klassimi atuartut pujortartalinnginnissaat qanoq qulakkeerneqassanersoq. Pilersaarusiaq Peqqinnissaqarnermut Naalakkersuisoqarfimmut novemberip 30-at 2012 nallertinnagu nassiunneqassaaq.
Klassilu pilersaarusiorluarnerpaasimasoq 30.000 koruuninik eqqugassaqarpoq. Akissarsiassanilli tigusinissami piumasaqaataassaaq klassimi atuartut tamarmik pujortartartuunnginnissaat.
- Siornatigut taama unammisitsigaangatta unammisitsinerup kingorna klassimi pujortartoqarnersoq isiginiartarsimanngilarput, ukioq mannali tamanna allanngussaaq. Ukiunilu aggersuni Inuuneritta-mit meeqqat inuusuttullu pujortartalinnginnissaat anguniarlugu annertuumik suliniuteqartoqassaaq, Kathrine Tronhjem taama oqarpoq.
Unammisitsineq pillugu paasissutissat uani atuarsinnaavatit www.paarisa.gl.