Pujortartarfeerunneq ikuallattoornernik kinguneqartarpoq
Utoqqaat iniminniittariaqarput, siniffimmilu pujortarneq ineqartunut toqumik kinguneqarsinnaasarluni.
Ole Mørch Nielsen nakorsat oqallittarfianni utoqqarnik isumaginninnermi pisortat peqatigiiffianni siulittaasuuvoq, taassumalu utoqqarnik paaqqinniffinni ikuallattoornerit arlallit tusaamavai.
- Inuit namminerisaminnik iniminniittarput immaqalu peqqippiaratik pujortakkamik aamaat nakkaasinnaallugit, naak pujortarnermut atugassaminnik saaliaqutaasaqaraluarlutik taava aamaq aamaarnerulersinnaavoq tassanngaannarlu ikuallattoqalerluni, taavalu putsumut kissarnermullu kalerrisaarutit nalinginnaasumik qilaami inissinneqarajuttarlutik, putsullu qilaamut anngunissaanut piffissaq sivisungaatsiartoq ingerlasarluni, Ole Mørch Nielsen oqarpoq.
Utoqqarnik paaqqinniffinni ikuallattoornerit amerlanerit inini ataatsimoorfissiani pujortaqqusiunnaarnermut assorsuaq attuumassuteqarput, taavalu utoqqarnik paaqqinniffinni sullissivinnilu allani pujortartartut inini nammineq immikkut inissittarlutik.
Tamanna assut ajornartorsiutaasarpoq, tassami sulisut allalluunniit nakkutiginnissinnaanngimmata, ajornartorsiullu qanoq iliuuseqarfiginiarneraat Ole Mørch Nielsen aperineqarami akivoq:
- Ajornartorsiutip tamatuma aaqqiiviginiarnera qanorluunniit iliorluta peqataaffigiumavarput, oqartoqarsinnaagunarporlu tamatuma aaqqinniarnissaa eqqarsaatigilluagaanerpaaq tassaassasoq inuit pujortartartut allat ilanngullugit oqarfigeqqikkaanni sumi aammalu nakkutigineqartumi imminnullu isigisinnaallutik pujortarsinnaanersut. Qinigassalli aappaa tassaavoq soorunami ilaasortavullu tamanna oqaluuserisinnaagatsigu, tassami najugaqartut sapinngisamik pitsaanerpaamik atugaqarnissaat uagut taamaallaat soqutigigatsigu, taamaalillutalu pisut sammissallugit.
Danmarkimi utoqqarnik paaqqinniffinni 2007-imi ikuallattoornerit 50-iusimapput,
Nunatsinni pujortartarneq pillugu inatsit nutaaq oktobarip aallaqqaataani atuutilissaaq. Pujortaqqusinnginneq ilaatigut utoqqarnut utoqqarnik paaqqinniffinniittunut atuutissaaq.
