Nalunaarusiaq nutaaq: Pujortartartut ikilipput sodavanditorneruvugulli
Ullut tamaasa pujortartartut ikinnerupput, amerlanerusullu ullut tamaasa naatitartortarlutik.
Illuatungaanili pualavallaartut amerliartuinnarput, inooqataanikkut naligiinnginneq annertusiartorpoq, aalisagartortartut ikiliartorput sodavanditunngikkunillu saftitortartut amerliartorlutik.
Nunatsinni innuttaasut peqqissusaannik misissuinermi nutaami tamanna atuarneqarsinnaavoq.
Nalunaarusiaq naapertorlugu 2014-imit arlalitsigut pitsanngoriaateqarpoq. Innuttaasut 52 procentii siorna ullut tamaasa pujortartarput. Amerlagaluartullu, pujortartartut ukiuni qulikkuutaani kingullerni ikiliartuinnarsimapput: 1993-imi ullut tamaasa pujortartartut 68 procentiupput.
Aamma angerlarsimaffippassuarni pujortarnissaq killilerneqarsimavoq, nalunaarusiarlu naapertorlugu nerisassaaleqisartut nerisassarsiutissaqanngitsullu ikinnerulersimallutik.
19 procentit imigassartorneq-ajorput.
40 procentit ikinnerpaamik ataasiarlutik qaammammut imigassartortarput.
29 procentit qaammammut marloriarlutik-sisamariarlutik imigassartortarput.
9 procentit sapaatit-akunnerannut marloriarlutik-pingasoriarlutik imigassartortarput.
3,1 procentit sapaatit akunnerannut sisamariarlutik akulikinnerusumilluunniit imigassartortarput.
Najoqqutarisaq: Innuttaasut peqqissusaannik missuineq 2018
Aalisagartortartut ikileriarput sodavanditornerulerlutillu
Pissutsilli innuttaasut peqqissusaannut ajorseriaataasut aamma arlaqarput. Assersuutigalugu peqqissutut imminut nalilertut ikileriarsimapput. Aamma aalisagartortartut ikileriarsimapput, sodavanditunngikkunillu saftitortartut amerleriarsimallutik.
Innuttaasut 42,8 procentii siorna sapaatit akunnerannut ikinnerpaamik ataasiarlutik aalisagartortarput. Siornatigut 56 procentiugaluarput.
Ullullu tamaasa sodavanditunngikkunik saftitortartut amerlerialaarput – 43,9 procentiullutik. Ullut tamaasa sodavanditunngikkunik saftitortartut siornatigut 24,4 procentiugaluarput.
Pualavallaartut. Pualavallaartut 2018-imi 27 procentiupput, arnallu angutinit amerlanerullutik. Pualavallaartulli amerlassusaat 2014-imut naleqqiullugit allannguuteqarpallaanngillat.
Imigassartorneq: Innuttaasut peqqissusaannik misissuineq 2018-imeersoq naapertorlugu imigassartorneq-ajortut 19 procentiupput, 40 procentit annerpaamik qaammammut ataasiarlutik imigassartortarput, 29 procentit qaammammut marloriarlutik-sisamariarlutik imigassartortarput, 3,1 procentillu sapaatit akunnerannut sisamariarlutik akulikinnerusumilluunniit imigassartortarlutik.
Inuuniarnermi atukkat, inooriaaseq peqqissuserlu nalunaarusiami pingaarnertut sammineqarput, innuttaasullu 15-it 94-illu akornanni ukiullit illoqarfinnit aqqaneq-marlunneersut nunaqarfinniillu arfineq-pingasuneersut 2.539-t misissuinermi peqataapput. Tassalu innuttaasut 5,8 procentiisa missaat.
Nunatsinni imigassamik hashimillu atuineq, tarnikkut peqqissuseq, pujortartarneq, nerisaqarneq timimik aalatitsisarneq kiisalu peroriartornermi pissutsit arlallit nalunaarusiami sammineqarput.
Aammattaaq nappaatit anigorneqarsinnaanngitsut, pualavallaartut kiisalu sukkornermik nappaatillit aamillu naqitsineranik qaffasitsivaallaartut amerlassusiat sammineqarput.
Innuttaasut peqqissusaannik misissuinerit 1993-imi aallartinneqartut tallimassaraat. Peqqissutsimullu naalakkersuisoqarfik sinnerlugu misissuineq ingerlanneqarpoq.
