Pujoorfissuarmi akerliussutsimik takutitsisut

Avatangiissinik illersuiniaqatigiit 16-it taakku Greenpeace-meersuupput, akerliunertillu malunnartinniarlugu DONG Energy-p-suliffeqarfiussuata, Avedøre2-p, Avedøre Holme-p, Københavnimiittup, pujoorfissuanut 150 meterimik portussusilimmut, allagartarsuarnik nivinngaaniarlutik majuarrapput. Allagartarsuarni nivinngarniagaanni allassimavoq, ”aamarsuit atoqinagit”, taakkulu pujoorfissuarmut nivinngarniarpaat.

- Avedøre2 nukissiorfissuuvoq Danmarkip, DONG-ip Danmarkimilu naalakkersuisut tulluusimaarutigisinnaassaasa ikittunnguit ilaat. Aamarsuartoqqilernissaanik eqqarsaat ajornerpaavoq, tassami sila pillugu 2009-mi ataatsimeersuarnermi Danmark aaqqissuisuusussaavoq, aamarsuartoqqilernissamillu eqqarsaat piviusunngussappat Danmarkip tamanna tusaamanerluutigilersinnaavaa, Greenpeace-meersoq, Tarjei Haaland nutaarsiassaqartitsivimmut Ritzauimut oqarpoq.

Akerliussutsimik takutitsisut marluk pujoorfissuarmut majuartinnagit politiinit tigusarineqarput, sinneri 14-it suli pujoorfimmiittut.