Puisit Sikuiuitsoq Kujallermiittut misissuiffigiartulerpaat
Puisit akornanni nappaat pest-imik taaneqartartoq Danmarkimi puisit akornanni annertuumik toqqutaasarsimavoq. Kisianni Sikuiuitsumi Kujallermi puisit nappaammut akiuussutissaqarpasinnerupput.
Taamaattumik ilisimatooq Jonas Theilmann Danmarkimi Avatangiisinut Misissuisoqarfianeeroq Sikuiuitsumut Kujallermukalerpoq puisit tamaani qanoq ilillutik nappaammut akiuussutissaqalersimanerat paasiniaaviginiarlugu.
Suleqatini marluk Sverige-meersut peqatigalugit Sikuiuitsumi kujallermi puisini nappaammut akiuussutissaq qanoq ineriartortarnersoq sapaatip-akunneri arfinillit tulliuttut misissuiffiginiarpaat.
Sikuiuitsumi Kujallermi puisit 50-ikkunni pest-imik, mislingimut assingusumit eqqugaapput. Taamanikkumiilli nappaat taanna taqqavani puisinut sunniuteqarsimangaanngilaq. Danmarkimili taamaanngilaq 2002-mimi Kattegatimi aamma Limfjordenimi qasigissat affaat toqorarput.
Ilisimatusartut puisinit sisamanit assigiinngitsunit misiligutissaminnik tigusissapput. Taassuma saniatigut Ross-ip puisai ilisimasaqarfigineqanngingajattut qaammataasakkut nassitsissummik ikkussivigissavaat, aammattaaq arferit misissugassamik tigussiffigissavaat avatangiisinut toqunartoqarnersut paasiniarlugit.
Ilisimasassarsiortut svenskit umiarsuaanut Odenimut ilaassapput, Danmarkimi Avatangiisinut Misissuiveqarfik quppersakkaminitaama allappoq.
