Puisit pillugit USA iliuuseqalerunarpoq

Avatangiisinik illersuiniaqatigiiffiup innersuussuteqarneratigut USA-mi oqartussat taamaaliulersaarput, silap pissusaata allanngoriartornerata kingunerisaanik puist tammariartuaalernissaat aarleqqutigineqarmat.

Immap sikusarnera allanngoriartuinnarmat puisit pineqartut tammariartuaalersorineqarput. Issittup sikuata aattarnera annertusigaluttuinnarpoq, siornalu rekordiliisoqarmat siornatigumut naleqqiullugu siku 27 procentimik aannerusimalluni.

Nannut uumasut nungukkiartulersutut nalilerneqartut allattorsimaffiinut aamma ilanngunneqassanersut suli aalajangerneqanngilaq, qaammatilli marluk matuma siornatigut USA-mi oqartussaasut taamaaliortussaaniaraluarput.

US Geological Surveysip ilaatigut eqqoriarpaa nannut 2/3-iisa ukioq 2050-imi tammareersimassasut, sikup aakkiartuinnarnerata kingunerisaanik tammariartuinnassangatinneqarmata.