Puisit pillugit ilanngutassiaq nassuiarpaa
Nunatta Ammeriviata puisinniartalernissamut qinnuteqaataa pillugu ilanngutassiami allamut sangutitsiniartoqarsimannginnerarlugu tv-aviisi erseqqissaavoq.
TV-Aviisimi aviisiliortup Thomas Alling-ip ima nassuiarpaa:
- Amalie Jessenip oqaasiinut atatillugu allamut sangutitsiniarsimasutut oqaatiginiarneqarnerput eqqunngilluinnarpoq.
- TV-Aviisimi inuit apersorneqartartut allat assigalugit apersorneqarnera killorneqarpoq. Tassa apersuinermit sivisunerusumit killukkat TV-Aviisimi atorneqarput.
Thomas Alling aperineqarami ilanngutassiaminni sooq puiseeqqat avaartarneqartut assitaliussimaneraat, akivoq ilanngutassiami ersersinniarsimagitsik Nunatta Ammeriviata Kitaata sikuani puisinniartalernissamik qinnuteqaatimini avaartaatit nangitsissutitut atornissaat qinnuteqaatigisimagaa. Taamaattumillu Nunatta Ammeriviata Kitaata sikuani puiseeqqanik piniarnerminni avaartaatinik atuinissamik qinnuteqarnerat taamatut ersersinniarsimagitsik. Puiseeqqat qanoq paasisarnerai Thomas Alling aperineqarami oqarpoq puiseeqqanik oqartoqaraangat, paasisarlugu puiseeqqat tassaasut puisit piaraat sapaatip akunnerinik pingasunik sisamanilluunniit utoqqaassusillit.
- Nunatta Ammeriviata qinnuteqaatigaa Kitaata sikuani umiarsuarmik puisinniummik puisinniartalerumallutik qaammatini marsimi apriilimilu.
- Pinngortitaleriffimmit oqaatigineqarpoq; Kitaata sikuani marsimi apriilimilu puisinniartoqartassappat piniarneqartut tassaassasut puiseeqqat, Thomas Alling oqarpoq.
Canadami puiseeqqanik avaartaalluni puisinniarnermik takutitsinerminnut Thomas Allingip nassuiaatigaa, Nunatta Ammeriviata qinnuteqaammini avaartaatit atornissaat qinnuteqaatigimmassuk, avaartaatinik atuisunik takutitsisimallutik. Taamatullu ilanngutassiisimanertik peqqissimissutiginngikkitsik.
