Puisit niisallu politiinut ikiuutaasalissapput
Puisit niisallu politiinut allanullu sillimanermik sulialinnut siunissami iluaqutaasinnaanngussapput, soorlu inunnik tammaasanik ujaasinerni uppernarsaatissanillu pissarsiornerni. Ilisimatusartut Danmarkimi imartat ilaanni, tassa Kerteminde-p eqqaani, Fjord-aamma Bæltcenterimi puisinik niisanillu sungiusaanertik maanna ingerlatileruttorpaat. Danmarks Radio taama tusarliussivoq.
maajip 11-at 2008 17:21
Niisa eqqarsaatigissagaanni arfinnguup taassuma nammineq silappaarissusia iluaqutsiullugu imaani sunik mikisunnguugaluanik ujaasineq ajornarunnaartarpoq. Uumasullu taakku imarmiut atorluarnissaannut politiit suliaminnut atatillugu piariingajalerput.
-Puisi niisaluunniit ilinniartinneqarsinnaappata tamanna akornutissaqartinngilarput, Danmarkimi Naalagaaffiup politiivini qimmit nuna tamakkerlugu immikkoortortaanni pisortap tullersortaa, Per Thomsen, oqarpoq.
Puisit immikkut piginnaaneqarnerat qangali ilisimaneqareerpoq. Sakkutuut imarsiortut Sverige-meersut puisit immikkut sungiusakkat atortuliinnarlugit umiarsuit aqqartartut akeqqat nassaarinissaannut sorsunnersuup kingulliup nalaani atortarsimavaat.
