Puisit nannullu akoorutissaqannginnerulerput
Sananeqaat taanna pequtinut atisanullu aanaveersaatitut atorneqartaraluarpoq, taannali 2009-mi Nunarsuatsinni sananeqaatit ulorianarnersaasa ilaattut allassimasuutigineqalerluni. Tamatuminngalu inerteqquteqarnerup kinguneri uuttorneqarsinnaalersut, aviisimi Politikenimi allaaserineqarpoq.
Danmarkimi avatangiisinut ministerip tamanna nuannaarutigaa.
- Sananeqaatip toqunartullip atorunnaariartornissaanik Nunarsuarmiut tamakkerlutik isumaqatigiikkaangata tamanna iluaqutaasarpoq. Sananeqaat peqqissutsimut ulorianartorsiortitsisoq kræfteqalissutaasartorlu, meerartaarsinnaanitsinnullu ajoqutaasoq avatangiisitsinniikkunnaalerpoq, avatangiisinut ministeri Pia Olsen Dyhr Politikenimut oqarpoq.
Pinngortitami pissuseqatigiinnermut Siunnersuisoqatigiit tamanna aamma nuannaarutigeqaat. Siunnersuisoqatigiinnut ilaasortap akoorutissanut immikkut ilisimasallip Lone Mikkelsenip kisitsisitigut paasisat 'nutaarsiassatut pitsassuartut' taavai.
Taamaattorli PFOS tassaaginnarpoq sananeqaatit ulorianaateqartorpassuit nerisareqatigiiaarnermi katersuuttartut ilaannaat. Taamaattumik sananeqaatit toqunartullit ilaatigut inuussutissanut poortuutigineqartartut tamarmik, EU-mi inerteqqutigineqalernissaat, Danmarkip sulissutiginiarpaa.
