Puisit ilaat nungutaanissamut ulorianartorsiortutut nalilerniarpaat
Amerikami uumassusillit assigiinngitsut pillugit nalunaarsuisoqarfik – Center for Biological Diversity, maajimi allattorsimaffimmut puisit ilannguteqqullugit naalakkersuisunut siunnersuuteqarmata, maanna Amerikami naalakkersuisut piaarnerpaamik isummerfiginiarlugu nalunaarput.
Nunarsuarmi silap kiatsikkiartornera pissutigalugu, puisit nannut assigalugit ulorianartorsiornerarneqarput. Puisit pineqartut issittup sikuani najugaqarlutillu kinguaassiortarput, piaqqaminnik alliartortitsisarlutik qasuersaartarlutillu.
- Nalunaarusiat kingulliit siku aakkiartuinnartoq takutimmassuk, uumasut eqqorneqartut illersorneqarnissaannut piaartumik iliuuseqartariaqarpugut, Shaye Wolf, puisinik misissuisarfimmi pisortaq, oqarpoq.
Puisilli taakkua assigiinngitsut pingasut eqqissisitaagaluarpata, tamanna Alaskami naggueqatigiit Inuit, puisinniarsinnaatitaanerannut sunniuteqassanngitsoq, Shaye Wolfip naqissuserpaa.