Nappaat aattuunnartoq toqunartoq sælpestimik taaneqartartoq, danmarkimi puiserpassuarnut aattuussimavoq, puisillu tuusintillit toqorassutigisinnaagaat ritzau allappoq.
Puisit toqungasut Anholt-ip qeqertaaniittut missorneqareerlutik tamanna paasineqarpoq.
- Qaammatini aggersuni naatsorsuutigineqarsinnaavoq Danmarkimi sissani puiserpassuit toqoralernissaat, Skov- og Naturstyrelsemi orpippassuarnik nakkutilliisoq Henrik Lykke Sørensen oqarpoq.
Puisit nappaataat Sælpesten siornatigut marloriarluni puiserpassuarnik toqorartitsisarsimavoq. Siullermik 1988-imi Danmarkimi puisit 60 procentii taamani toqorarput, aappassaanillu 2002-mi puisit 30 procentii toqorarput.
Maannakkulli puisit toqorarujussuarnissaat ilimananngitsoq ilisimatooq Danmarks Miljøundersøgelsemeersoq, Rune Dietz oqarpoq.
- Puisit taamatut napppaalanerat kingulleq ukiualunguit matuma siorna pivoq, taamaammat puisit inersimasut timaanni akiuussutissartaqassapput, Rune Dietz oqarpoq.