Puisit amiinut tapiissutit pillugit isumaqatigiissuteqartoqarunarpoq
Aalisarnermut Pisortaqarfik Ammerivillu Great Greenland puisit amiinut tapiissutit pillugit ukiup sinnerani isumaqatigiissuteqarunarput.
Pisortaqarfik ullumi nalunaarpoq kiffartuussinissamik isumaqatigiissusiamut tapiliussatut isumaqatigiissummut tunuliaqutaasoq, ukioq manna aningaasanut inatsisissamut atatillugu 1,3 million koruuninik ilassutitut aningaasaliissuteqartoqarnissaanik aalajangiineq.
Piumasaqaataavorli puisit amii ikinnerpaamik 20.000-it inuussutissarsiutigalugu piniartunit kiffartuussinissamik isumaqatigiissummi 2005-imi piffissap sinnerani tunisaasimanissaat – tassa puisip amianut ataatsimut tapiissut ukiup sinnera 65 koruuniussaaq, ukioq manna manna tikillugu tapiissutaasartup affaa.
Ammit pineqartut eqqarsaatigalugit tunisinermi akit, pitsaassutsit aamma tunisinermut ilitsersuut KNAPK-p ammeriviullu Great Greenlandip akornanni isumaqatiginninniutigineqassapput, kiffartuussinissamik isumaqatigiissut naapertorlugu.
Aningaasaqarnermut ataatsimiititaliaq septemberip ulluisa 22-ianni naggammeerluni ataatsimiimmat tapiissut akuersissutigineqarpoq.
Tamanna pisariaqarsimavoq, ukioq mannami ameerutit ukiunut siuliinut naleqqiullugit marloriaatingajaasimapput, taamaammat tapiissutit tamarmik atorneqareersimallutik.
1,3 million koruunit ilanngunneqarpata, ukiormanna tapiissutit 24 million koruunit missaanniilissapput.
Ammerivik Great Greenland aamma KNAPK ammit akii pillugit tapiliussamik isumaqatigiissusiussapput, taassumalu kingorna tapiissutit tunniunneqarsinnaanngussallutik.
