Puisit amiinut isumaqatigiissut immikkut piumasaqaaterpassualik
Isumaqatigiissulli immikkut ittunik piumasaqaaterpassuaqassammat Kalaallit Nunaanni aningaasaqarniarnermut kinguneqangaarnavianngitsoq, Bruxelles-imi Kalaallit Nunaata sinniisoqarfianit Lars Vesterbirk oqarpoq.
Isumaqatigiissummi immikkut piumasaqaaterpassuaqassasaaq, tassungalu ilaavoq Inuit klausulimik taaguutilik, tassani piumasaqaataavoq Kalaallit Nunaanni piniariaaseq ingerlanneqartoq allannguutitaqarani ingerlaannassasoq, Lars Vesterbirk oqarpoq, taanna isumaqarpoq puisip amiinik piserusuttoqaannarusunnissaa apeqqutaasoq.
- Kalaallit Nunaani aningaasaqarniarneq imatut eqqorneqarnavianngilaq, piniartut amerlanngitsut eqqaassanngikkaanni, taakku immaqa eqqorneqarsinnaapput. Kisianni qanorluunniit pisoqaraluaraangalluunniit0 piniartut puisit amiinik tunisigaangamik akissarsisarput, aamma Namminersornerullutik Oqartussat puisit amiinut suli tapiissuteqartarput, taamaattumik isumaqatigiissutip kinguneqarnissaanik takorluuisinnaanngilanga, taamaallaat ajutoorsinnaavugut puisip amiinik piserusuttoqarunnaassagaluarpat, taamaattoqanngilarlu.
Suli puisip amiinik EU-mut eqqussuillutalu tunisassiorsinnaatitaavugut aamma EU-p avataaniittunut tunisagut annertusigaluttuinnarput, Lars Vesterbirk Bruxellemi Kalaallit Nunaata sinniisoqarfianeersoq oqarpoq.
Puisit amii pillugu isumaqatigiissut manna EU- inatsisartunit EU-milu ministerrådinit suliarineqassaaq, tamannalu ukiup ataatsip missaanik sivisussuseqarnissaa Lars Vesterbirkimit ilimagineqarpoq.
