Puisit amiinik tunisassiorneq oqallisigaat
Puisit amiinik tunisassiornermi Great Greenlandiinnarmut kiffartuussinikkut isumaqatigiissuteqartarneq allanngortariaqarpoq, puisit amiinik tunisassiortut allat aamma kiffartuussinikkut isumaqatigiissuteqarfigineqarsinnaasariaqarput, tamannalu aappaagu 2008-mi aningaasanut inatsisissaq aqqutigalugu piviusunngortinneqarsinnaavoq, taama nipilimmik Atassutip Inatsisartuni ilaasortaatitaasa siunnersuutaat, Inatsisartuni ullumi oqaluuserineqarpoq.
-Atassummit pingaartipparput inuussutissarsiutinik ingerlassaqartut naligiillutik pituttorsimanatillu unammillersinnaassuseqarsinnaasariaqartut, tamannalu puisit amii pillugit niuernermi aamma atuuttariaqarpoq. Atassummeersoq Thomas Kristensen saqqumiussinermini ilaatigut taama tunngavilersuuteqarpoq.
Suliffeqarfiit allat puisit amiinik tunngaveqarlutik ingerlatsisut Great Greenlandimut unammillersinnaassuseqarnikkut ajornartorsiuteqartarnerat Atassummit assersuutigineqarpoq.
Kiffartuussinikkut isumaqatigiissuteqarnikkut nunarput tamakkerlugu tunitsivissanik ingerlatsiinnarnissamut Great Greenlandip pisussaaffeqarnera Naalakkersuisut akissuteqarnerminni tunngavilersuutigaat. Taamatuttaaq puisit amiinik tunisinermi tapiissutit nunatsinnut sapinngisamik annertunerpaamik iluaqutaanissaat qulakkeerniarlugu, ammit tapiissuteqartillugit tunineqartut nunatsinni suliarineqartarnissaat Naalakkersuisut aalajangiusimavaat.
Puisit amiinut tunngasumik oqaluuserinninnerup naammassiartornerani, Demokraatit oqaaseqartuata Jens B. Frederiksenip Aalisarnermut Piniarnermullu Naalakkersuisoq Finn Karlsen eqqunngitsumik paasissutissisimanerarmagu, Atassutikkut kissaateqarput, ataatsimiinneq minutsini qulini kipitinneqarallassasoq, ataatsimiinnerlu aallarteqqimmat Atassutikkunneersoq Emilie Olsen qaqivoq oqarlunilu ataatsimiinnerup kipitinneqarnissaanik kissaateqarsimanertik paatsoornermik tunngaveqarsimasoq tamannalu utaqqatsissutigaa.
Atassutikkut siunnersuutaat Inatsisartuni amerlanerussuteqartut itigartippaat.
