Puisit amiinik EU-p eqqusseqqusinnginnera akiorniaqquaat

-Inooriaaserput attatiinnarniarlugu akiuuppugut, puisillu amiinik EU-p eqqusseqqusinnginnera Issittumi inuuniarnitsinnut navianartorsiortitsivoq, Inuit Tapiriit Kanatami siulittaasoq, Mary Simon, tusagassiutinut allappoq.

Kattuffik Inuit Tapiriit Kanatami isumaqarpoq, uumasunik illersuiniaqatigiit kukkusumik paasissutissiisimanerat puisit amiinik Canadameersunik eqqusseqqusinnginnermik EU-p aalajangerneranut pissutaasoq.

-Puisinniariaatsinit assit Europami innuttaasunut takutinneqaraangata uumasunut illersuiniaqatigiiffinnut inuit tuaviinnaq aningaasaliisarput. Inuit inuiaqatigiillu, taakkulu qanoq inooriaaseqarnersut, takutinneqarneq ajorput, Europami innuttaasut uumasunut illersuiniaqatigiiffinnut aningaasaliisarnermikkut qanoq ajoqusiitigisarnerlutik ilisimanngilaat, Mary Simon allappoq.

Canadami ministeriuneq Mary Simonip maanna kaammattorpaa EU-mut sukkanerpaamik sunniiniaqqullugu.