Puisit amiinik EU-mut eqqussinissaq inerteqqutaalissanngilaq

Puisit amiinik EU-mut eqqussinissaq inerteqqutaalissanngilaq.

Puisit amiinik EU-mut eqqusseqqusaajunnaarnissamik EU-parlamentip kajumissaarutaa EU-kommissionip massakkuugallartoq itigartippaa- taamaallaat puisit inunnit piniartunit pisarineqarsimasut amiisa eqqunneqarsinnaanerat akueralugu.

Puisilli amiisa Kalaallit Nunaanneersut EU-mut eqquteqqusaanissaat inerteqqutaassanngikkaluartoq, taamaattoq inerteqquteqalernissaq pinngitsoorniarlugu Naalakkersuisut assorsuaq isumaqatissarsiorsimapput. Imaakkamimigooq puisit amii eqquteqqusaagaluartulluunniit eqquteqqusaajunnaartutulli assut aamma eqqugaassasut – taamaammat kommissionip aalajangiutaa nuannaarutigineqarpoq.

Nuannaarnerli immaqa sivikitsuinnaassaaq. Puisimmi amiinik EU-mut eqqusseqqusaajunnaarnissamut kissaateqarneq marlunnik peqquteqartinneqarsimavoq. Siullermik peqqutigineqarsimavoq, puisit pineqartut nungutaalernerat – kommissionilli tamanna akerlilerluinnarpaa. Aappaattut: puisinik toqoraasarneq naakkittaatsuliornerusoq. Tamatumunnga EU-komissioni isumaqarpoq, tamanna iluamik uppernarsaatissaqanngitsoq. Taamaammat EU-kommissioni nammineq misissuisitsiniarpoq, misissuinerlu naammasseriarpat apeqqut taanna qaqeqqinneqarumaarpoq. Misissuinissaq qaqugu aallartissanersoq, qanorlu sivisutigissanersoq, killilerneqanngilaq – kommissionili ilisimatitsivoq piaarnerpaamik aallartinneqassasoq.