Puisit amiinik atisalianik takutitsisut
Uumasunik illersuiniaqatigiit ukiut tamaasa Newfoundlandimi puisinniarneq akerliuniarfigalugu akerliussutsimik takutitsiffigisarpaat.
Uumasunik illersuiniaqatigiit inatsisartut ataatsimiittarfiata saavani akerliussutsimik takutitsileruttortut, illuatungilerlugit naggueqatigiit Inuit inuusuttaat puisit amiinik atisalianik ullumi takutitsipput.
Canadami uumasunik illersuiniaqatigiiffiit, Canadami inatsisartut ataatsimiittarfiata silataani puisinniarnermut akerliunerminnik ullumi takutitsipput. Uumasunik illersuiniaqatigiit Newfoundlandip eqqaani ukiumoortumik puisinniartarneq akerliuniarfigaat.
Taamaattorli naggueqatigiit Inuit inuusuttaat Nunavummeersut Nunavimmeersullu, Ottawami ilinniagaqartut, Ottawami inatsisartut ataatsimiittarfiata silataani aamma akerliussutsiminnik takutitsipput. Inuusuttut ilinniagaqartut taakkua, Canadamiut allatut eqqarsaatissinnissaat kissaatigaat... taakkua puisit amiisa Canadami naggueqatigiinnut Inunnut qanoq pingaaruteqartiginerat takutikkusuppaat.
Taamaattumik silami atisanik takutitsipput, takutillugit puisit amiinit atisaliat, qarliit parkallu aamma atisat mutiunerusut, soorlu kjuulit timersornermilu atisat.
Naggueqatigiit Inuit inuusuttaasa puisit amiisa naggueqatigiinnit Inunnit suli pisariaqartinneqarnerat aamma puisip amiata nunarsuarmi nutaaliorfiusumi qanoq atorneqarsinnaanera takutikkusuppaat.
Ilinniagaqartut ilaat Kathleen Merritt, tusagassiorfinnut oqarpoq, naggueqatigiit Inuit inuusuttaasa uumasunik illersuiniaqatigiit illuatungilersornianngikkaat, taamaallaalli puisit amiisa qanoq atorneqarsinnaanerat Canadamiunut takutikkusukkitsik, aamma puisit amiisa naggueqatigiinnut Inunnut, aamma inuusuttaannut qanoq pingaaruteqartiginerat takutikkusukkitsik.
Canadami puisinniarneq naggueqatigiit Inuit aningaasarsiornerannut kisimi pingaaruteqarani, Newfoundlandimi puisinniartartunut aamma pingaaruteqarpoq, taakkuli uumasunik illersuiniaqatigiinnit ukiut tamaasa saassutarineqartarput.
