Puisit amii pisiariumaneqaqqilerput
Danmarkimi tuniniaavimmi Kopenhagen Furimi kingullermik akitorserussilluni tuniniaasoqarmat Great Greenlandip amminit 8.000-iusunit 5.000-it tunivai.
Allattoq Louise M. Kleemann
Taamaalilluni ukiut pingasut ingerlanerini aatsaat siullermeertumik puisit amii taama amerlatigisut akitsorterussinermi tunineqarput. Ammit tunineqartut 1,3 mio koruuninik naleqarput.
- Tunisaqarnissarput siunertaralugu annertuumik suliniuteqarsimavugut, ammeriviup pisortaa Henrik Estrup Sermitsiamut oqarpoq.
Aamma minkit akiisa akitsornerat puisit amiinik soqutiginninnerulernermut peqqutaaqataanerarpaa.
Puisit amiinik pisisut ilaatigut Kinameersuullutillu Dabnmarkimeersuupput. Henrik Estrupilli naatsorsuutigaa ammit annerusumik kavaajaliarineqassasut.