Puisit amii meeqqallu kaattut ICC-mi immikkut oqallisigineqassapput

Inuit Issittormiut Siunnersuisoqatigiiffiata nunatsinnit aallartitai, ulluni tulliuttuni marlunni Nuummi immikkut ittumik ataatsimiissapput. Puisit amii, meeqqat angajoqqaaminnit pisortanillu imminiiginnakkat ataatsimiinnermi ilaatigut eqqartorneqassapput.
Allattoq Louise M. Kleemann
januaarip 29-at 2009 06:59

ICC-p nunatsinnit allartitai aatsaat aasaru nalinginnaasumik ataatsimiittussaagaluarput. Ullunili makkunani oqallisaasut pissutigalugit ataatsimiinnissaq siuartinneqarpoq.

- Nunatsinni pissutsit ilungersunartut maanna nunatsinni nunattalu avataani oqallisigineqarput. Puisit amiinut tunngatillugu aamma kalaallit meerartaasa atugaat pillugit nunatta avataani eqqartorneqaraangata, piaaraluni eqqunngitsunik paasissutissiisoqartarpoq. Nunatsinni ICC-p siulittaasua Aqqaluk Lynge oqarpoq.

Taassuma oqaatigaa, Naalagaaffiit Peqatigiit kalaallit meerartaasa atugaat naliliiffiginngisaannarsimagaat, naak tamanna UNICEF-ip Danmarkimi immikkoortortaata taamaanneraraluaraa.

- Meeqqanik sumiginnaaneq, tamanna oqartussanit angajoqqaanilluunniit ingerlanneqarpat, ilungersunartuuvoq, misissuinerillu assigiinngitsut tamakkiisumik nalilersornissaat pisariaqarpoq, Aqqaluk Lynge oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq