Puisit amii isumaqatigiinngissutigineqarput
Kalaallit Nunaanni Canada-milu puisinniat tamatigut peqatigiilluinnartassappat? Apeqqutip taassuma suli inatsisartut avissaartuutseqqavai.
Inatsisartut aalisarnermut, piniarnermut, nunalerinermullu ataatsimiititaliaani ilaasortat tamangajammik akerliupput. Canada-miut piniariaasiannut Kalaallit Nunaata ungasinniannginnissaannut, ataatsimiisitaliap siulittaasua Ane Hansen, IA, kisimiilluni naalakkersuisut aaliangiinerannut, isumaqataavoq.
Ataatsimiitsitaliap ataatsimiinnerani kingullermi naalakkersuisut piumasaqarfigaat, Great Greenlandip Canadamit puisit amiinik pisisinnaanera unitseqqullugu. Ataatsimiitsitalialli piumasaqaataa Naalakkersuisut akueriumanngilaat, tamannalu naalakkersuisut siulittaasuata Hans Enoksen-ip akissuteqataani takuneqarsinnaavoq.
Inatsisartut aalisarnermut, piniarnermut, nunalerinermullu ataatsimiititaliaat isumaqarpoq kalaallit piniartuisa avataanit isigineqarnera ulorianartorsiussasoq, puisit amiinik canadameersunik pisisoqaqqittalissappat. Ataatsimiitsitaliattaaq aarleraaq nutaarsiassaqartitsivinnit nunanit allaneersunit ajortumik oqaluuserineqarneq suliffeqarfiit allat, ilaatigut takornariaqarnerup, ajoqutigissagaa.
Immami uumasunik piniarneq eqqartorneqartillugu tusagassiutinut saqqummeriaaseq tunngavilersorluagaallunilu paasinarluartuusassasoq
Hans Enoksen-ip akissutaani atuarneqarsinnaavoq.
- Inuinnaat sunniiniarlutik suliniarnerat, nunarsuarmi inunnit ikittunnguanit tapersersorneqartut, oqalliseqatigerusunngilagut, Hans Enoksen Ane Hansenimut akissuteqarnermini allappoq.
Ataatsimiitsitaliami ilaasortat – Kim Kielsen, Lars-Emil Johansen, Augusta Salling Jens B. Frederiksen-ilu - amerlanerussuteqartut isumaqataanngillat.
