Puisit amii EU-mi inerteqqutaassanngillat
Puisit amii suli Europami tunineqarsinnaagallarput. EU-mi ilaasortat avatangiisinut ministeriisa ataatsimiinnerat inerneqanngilaq. Tuluit Nunaat nunallu Europap kangianiittut tamakkiisumik inerteqquteqartitsinissamik kissaateqaraluarput iluatitsinatilli.
Allattoq Louise M. Kleemann
oktobarip 21-at 2008 11:38
Danskit avatangiisinut ministeriat Troels Lund Poulsen, kalaallinut iluaqutaasussamik torrallatamik oqalugiarpoq. Oqallinnerli misigissutsinik aqunneqarsimaqisoq inerneqanngilaq. Kommissioni apeqquterpassuarnik misissugassaminnik tuniorarneqarsimavoq, puisillu amiinut tunngasup EU-mi oqallisigeqqinnissaa qaammatini arlalinni utaqqeqqittariaqassavarput, nunatta aallartitaqarfianeersoq Lars Vesterbirk radioaviisimut oqarpoq. Unnugu radioaviisimi pisoq annerusumik sammissavarput.
