Puisit amii assortuussutaapput
EU-parlamentaarikeri konservativineersoq Gitte Seeberg eqqunngitsunik paasissutissiisimanera pillugu, Great Greenland-ip pisortaa, Michael Nielsen, qisuariarpoq. Taama Sermitsiap nittartagaani allaaserinnittoqarpoq.
Aviisimi ullormut saqqummersartumi Informationimi Gitte seeberg oqarpoq, Great Greenland-imi puisit amii atorlugit tunisassiarisartagaasa affaasa missai, Canadami puisinik pisarineqarsimasuneersuusut.
Taamaammat Gitte Seebergip piumasaraa Canadami puisinniariaatsip allanngortinneqarnissaanik piumasaqarnissaq.
Paasissutissalli suminngaaniit pissarsiarineqarsimanersut, Great Greenland-imi pisortap Michael Nielsen-ip paasisinnaanngilaa:
- Paasissutissat suminngaanniit Gitte Seeberg-ip pissarsiarisimanerai naluara, eqqunngillalli. Canadameersunik puisit amiinik 2005-imili pisisimanngilagut, tamannalu peqquteqarpoq, Canadami puisinniariaatsip akerlerineqarnera. Puisilli amiinik Canadaminngaanniit pisissatilluta, puisit aallaammik aallaaneqarsimanissaat qulakkeeqqaarniartarparput. Puisit aallaammik aallaaneqarlutik toqunneqarsimaneri qulakkeerniarlugu, suleqatitsinnik Canadamukartitsisarpugut, Michael Nielsen Sermitsiamut taama oqarpoq.
Great Greenland namminersornerullutik oqartussanit pigineqartoq, Canada-meersunik puisit amiinik pisisinnaanera pisortanit kiililersorneqaleraluarsinnarluni, 2006-imi puisit amiinik Canadamut pisiniarsinnaanera ammarneqaqqippoq. Taamaakkaluartoq Great Greenland, 2005-imili Canadamut puisit amiinik pisiniarsimanngilaq, puisit nunatsinni pisarineqartartut naammassimammata.
