Puisinniat akerliuniallu piniariarfiliaapput
Canadami puisinniartartut puisinniartarnermullu akerliusut Canadami kangerliumanersuup Sankt Lawrencep tungaanut maanna aallaruttorput, puisinniartartut ukiumoortumik pisaqamajartorlutik, arlaallu tassunga akerliujartorlutik.
Puiseerarpaasuit tusindtilikkaat avaartarlugit pisarineqarumaartut naatsorsuutigineqarpoq.
Uumasunik illersuiniat nutaarsiassaqartitsivimmi BBC News-imi oqarput, avaartaalluni puisinniartarneq pisariaqanngitsumik naakkittaatsuliornerusoq.
Ministeriuneq Stephen Harper oqarpoq Canadami puisit 6 millionet missaanniittut, 1970-imullu sanilliullugu pingasoriaammik amerlanerusut.
Canadap naalagaaffiata piuisittassiissutai 5000-inik ilaneqarput, puisinniallu taamalillutik 325.000-inik pisassinneqarput.
Taamattorli Sankt Lawrencemi siku saappallaarmat puisinniarneq ajornakusuussagunartoq umiatsiaanillu piniartoqartariaqassagunartoq oqaatigineqarpoq.
Puiseeqqat amii qernertikkaangata tassa sapaatit-akunnerinik marlunnik utoqqaassuseqaleraangata pisarineqarsinnaanerat inerteqqutaajunnaartarpoq.
Puisinniartarnermut akerliuniat, puisinniarnerup nalaani puisit neqaannik piseqqusinatik, Amerikami neriniartarfinnut attaveqaqattaarput.
Akerliuniat nunarsuaq tamakkerlugu akerliussutsimik takutitsiniarlutik aamma pilersaaruteqarput.
