Puisinniartarnermut akerliusut akinerlutsipput

Ilaqutariit Minnesotami najugallit canadamiut puisinniartarnerat ajoralugu inuppalaanngitsutullu isigalugu, Canadamut angalanissartik unitsissimagaat, Montrealimi aviisip La Pressep allaaseraa.

Ilaqutariit canadamiut puisinniartarnerat eqqartorneqaqisoq pillugu canadami senatorinut arlalinnut aamma allassimapput, ilimaginngilluinnakkaminnillu akineqarput.

Canadami senatorip killilersuerusunngitsup, Celine Hervieux-Payette-i, toqqaannartumik naalakkersuineq tunngavigalugu allalluni ilaqutariit akisimavai ima:

- Irakimi inunnik pisuussuteqanngitsunik ullut tamaasa toqoraasoqartarpoq, Amerikamiut paarnaarussivianni qernertormiuunerusunik pillaalluni toqutsisoqartarpoq, aammalu amerikamiunut illuinnarsiutinik tuniniaasarneq kusaginngilluinnarpakka.

Senator Celine Hervieux-Payette amerikamiunut akerliulluni oqaaseqarsimanini pillugu pillagaassanersoq ilisimaneqanngilaq.

Celine Hervieux-Payettep 2004-mi George Buship inuusaliarineqarnera tukkarsimagamiuk partiimi siulersuisunit anisitaasimasoq suleqatigisimasaa oqaluttuarpoq.