Puisinniarnermut akerliussutsimik takutitsiniartut
Kisianni Inuit Tapiriit Kanadami siulittaasup, Mary Simonip, tasamani aviisit annersaanni ullumi allaaserisaqarluni tamanna pinngitsoorteriaraluarpaa. Mary Simonip ilaatigut Canadamiut paasitinniaraluarpai, puisit amii assigiinngitsunik marlunnik periaaseqarluni pisarineqartuneersuusarmata, tassa puisit amii naggueqatigiit Inuit piniartortaannit pisarineqartut allallu puisinnianit allanit pisarineqartartut.
Marianne Stenbækip paasissutissiinera najoqqutaralugu Tola Rosing Carlsen paasissutissiissaaq.
Canadami sapaatiuppat illoqarfinni arlalinni puisinniarnermut akerliusut akerliussutsimik takutitsinissaat pilersaarutigineqarpoq, tamannalu Ottawami parlamentip illorsuata saavani pissalluni.
Inuit Tapiriit Kanatami siulittaasoq Mary Simon, ullumi Canadap aviisiisa annersaanni, the Globe and Mail-imi allaaserisaqarpoq, Canadamiut piumaffigalugit akerliussutsimik takutitsinermut peqataaqqunagit kiisalu uumasunik illersuiniaqatigiiffinnut aningaasanik nassiussueqqunagit.
Allallunilu tamatumunnga taarsiullugu Canadamiut puisip naggueqatigiinnut Inunnut qanoq pingaaruteqartiginera paasisariaqaraat. Oqaluttuaralugulu puisinniarneq issittup nunaqarfiini kisimi aningaasarsiutaasoq. Naggueqatigiinnummi Inunnut amerlasuunut paasiuminaatsuuvoq, nunarsuarmioqataasut inuit allat uumasunik allanik inuussutillit taamatut pisassanut pingaarutilinnut akerliusinnaammata.
Mary Simon aamma allappoq, puisinniarneq naggueqatigiinnut Inunnut tassaammat nerisassat, atisassat issittumilu inooriaatsip pingaanersaanut ilaasoq.
Erseqqissarlugulu EU-mi naalakkersuisut ilaat oqarmata Inuit puisinniartarnerat unitsinniarnagu, kisianni, oqarpoq, nalinginnaasumik atuisut tamatigut paasisinnaanngikkaat puisip amia naggueqatigiinnit Inunnit piniartunit allanilluunniit pisarineqarsimanersoq.
Mary Simonip Canadamiut piumaffigai akerliussutsimik takutitsinermut peqataaqqunagit… uumasunik illersuiniatuut aningaasanik piumasaqanngilagut, taamaallaat eqqarsaqqinnissassinnik piumaffigaassi… eqqarsaatigisiuk puisinniarneq naggueqatigiinnut Inunnut qanoq pingaaruteqartiginersoq, inuimmi taakku amerlanertigut allamik inuussutissaqanngillat.
