Puisinniarneq aallartippat PETA-p erfalasoq qiteqquteqquaa

Canadami sapaatip akunnerata uuma naanerani avaartaalluni puisinniarnissarsuaq aallartissaaq, tassungalu akerliuniarluni Canadap erfalasuata qiteqqullugu amuneqarnissaanik, uumasunik illersuiniaqatigiiffiup PETA-p qinnuteqaataa, Iqalunni kommunalbestyrelsep tigusimavaa itigartillugulu.

Itigartitsinermut atatillugu Iqalunni borgmesterip Elisapee Sheutiapiup uumasunik illersuiniaqatigiiffimmiut Iqalunnut qaaqquvai, puisinniartarnermut akerliuniarnerup issittormiunut kinguneri namminneerlutik takuniassammatigit.

Uumasunik illersiniaqatigiiffimmiut erfalasup qiteqqunneqarnissaanik qinnuteqaatertik Canadami illoqarfinnut allanut nassiussimavaat, allakkunut ilanngussimallugu puiseeqqanik avaartaalluni toqoraanermit videoliaq.

Allakkap Nunavummut aamma apuussimanera PETA-mi ataqatigiissaarisup Matt Ricep paasisimanerarpaa, oqarporlu allagaq Canadap kangiani avaartaalluni puisinniartarnermut tunngatinnerugitsik.

- Canadami naalakkersuisut Inuit puisinniartarnerat illersuutiginiarsaraat, kisianni Inuit puisinniartarnerat avaartaallunilu puisinniartarneq periusaapput assigiinngilluinnartut marluk, PETA-llu tungaaniit Inuit puisinniartarnerat akerlerineqanngilluinnarparput, Matt Rice erseqqissaavoq, Iqalummiullu puisinniartarnerminnik takusaaqqusillutik qaaqqusinerat nuannaarutigalugulu aggerumalluni oqarpoq.