Puisinit tunisassianit eqqusseqqusiunnaarnissaq ernumagineqarpoq

NAMMCO-mi Siunnersuisoqatigiit septemberimi ukiumoortumik ataatsimiinnerminni, EU-mi ataatsimiittartoqatigiit puisinit tunisassianik EU-mut eqqussuinerup inerteqqutaalernissaanik aaliangiussaqarneranut siorna oqaaseqaatigisimasartik erseqqissaqqippaat naqissuseqqillugulu.
septembarip 09-at 2010 08:54

Siorna NAMMCO-mi Siunnersuisooqatigiit inerteqqut taanna Atlantikup Avannaani miluumasunik imarmiunik nungutsaaliuinerup aqutsinerullu tunngaviinik nunani tamalaani akuerineqartunik sumiginnaanerusoq akornusersuisuusorlu, oqaaseqaatigaat.

- Inerteqqut atortinneqaannaruni nunaqqatigiippassuarnut Atlantikup Avannaani tamarmi puisinik amerlatsissimaqisunik isumalluuteqartunut ilungersunaqisunik kingunerlussaqaaq, NAMMCO-mi Siunnersuisoqatigiit oqaaseqaamminni allapput.

Ataatsimiittartoqatigiit nangillutik allapput NAMMCO-mi nunanut ilaasortaasunut, nunanullu alaatsinaatsutut inissisimasunut inerteqqut taanna assorsuaq isumaliornartoqartitsilersoq.

- Inerteqqutip EU-p inatsisaanut ilanngunneqarnera piujuaannartitsineq tunngavigalugu ineriartortitsinermi nunallu tamalaat niueqatigiinnerani kinguariaataaqaaq, ataatsimiittartoqatigiit taama ilaatigut oqaaseqaateqarput.

NAMMCO-mi nunat ilaasortaasut tassaapput Savalimmiut, Kalaallit Nunaat, Islandi aamma Norge, kiisalu nunat alaatsinaatsutut inissisimasut tassaapput Canada, Ruslandi aamma Japan.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq