Puisinik nappaalasunik suli siumuisoqanngilaq
- Natsiit meqqoqanngitsut, ikeqarlutillu ajuartut, anersaartornermikkullu ajornartorsiuteqartut amerlasuut siumorneqarsimapput. Puisit nappaalersimanissaat taamaammat aarleqqutigaarput, Aqqalu Rosing-Asvid, sivisuumik ilisimatusarsimasoq oqarpoq.
Aataaq Baffinip kangerliumarngata kujasinnerusortaaniittoq assingusunik takussutissalik, sapaatip-akunnerata siuliani siumorneqarpoq:
- Aataat Baffinip Kangerliumarngata kujasinnerusortaaniittut Nunatta imartaanukartarput aamma, nappaalanerullu Issittumut siaruaannissaa aamma aarleqqutigineqarpoq. Sunarpiarli nappaatigineraat suli naluarput, Rosing-Asvid oqarpoq.
Aataaq Nuup eqqaani Kangersunermi 2007-imi aallaaneqartoq, puisit Alaskami nappaalanerattut takussutissaqarpoq, pisarineqartorlu taamanikkut qeritinneqarpoq, nappaataa suunersoq ilisimaneqanngimmat:
- Puisi taanna maanna misissorneqassaaq, puisit Alaskami nappaalanerattut nappaateqarnersoq paasiniarneqassammat, Aqqalu Rosing-Asvid oqarpoq.
Puisit nappaalanerat inunnut ulorianarsinnaanersoq, taassuma annerusumik oqaaseqarfigisinnaannginnerarpaa, pisaqartoqassagaluarpalli mianersortoqassaaq. Puisi aaqqaserluni passunneqassaaq, neqaalu nerineqassanngilaq, qimminullu nerukkaatigineqassanngilaq.
Aqqalu Rosing-Asvidip ilimagaa puisit nappaalasut takussaaleraluttuinnassasut, puisimmi ullumikkut amerlassutsimikkut allanngungaarnavianngitsut oqaatigaa, akerlianillu ikiliartussangatillugit.
Puisimik meqqoqanngitsumik, ikeqarlunilu ajuartumik siumuisoqassagaluarpat, Pinngortitaleriffimmut saaffiginnittoqarnissaa kaammattuutigineqarpoq.