Puisi marlunnik illaalik pisarineqartoq
Uumasunik ilisimatooq oqarpoq taamatut puisit marlulisarnerat qaqutigoorluinnartuusoq.
”Puisimik tassa marlunnik illaalimmik qaattartoqarsimagami. Tassa pisaqartuuvoq Knud Eliasseni, Kunuunnguaq, tassa taassuma oqaluttuuteriarmanga taakkua puisiarannguit marlunnguit takujartorsimavakka alutornarluinnarput .”
Taamatut oqaluttuarpoq ilanngutassiortoq Lars Jensen, Kullorsuarmeersoq Janus Maqemut. Puisilu pineqartoq tassaavoq natseq.
Paasissutissallu taakkua aallaavigalugit Pinngortitaleriffimmi biologeq ilisimatusartorlu Aqqalu Rosing-Asvid saaffigigatsigu ima oqarpoq:
Puisit marlulisanngikkaluarput, qaqutigoortorujussuuvorlu marluliisarnerat, ataasiaannarlunga takunikuuvunga kisianni tassa qaqutigoortorujussuuvoq, Aqqalu Rosing-Asvid oqarpoq.
Puisit qaqutigorsuaq marlulisarnerannut peqqutaavoq mannissaqarfii illiaanut ataannartuummata mannissaqarfiit aqqutaannik akunneqaratik immikkooratillu. Tassa mannissaata aappaa puisip illaaqarnerata nalaani sinittutut ittarpoq, taamaasillutik mannissaqarfiit taakkua marluk paarlakaajaallutik naartussutaasarput.
Taamaammat marlulisartut mannimmit ataasiinnarmeersinnaasarput. Aammali puisit ataatsikkut marlunnik uumatitsiniarsinnaanerat ajornartorujussooreerpoq, tassami natsiit sivisunerpaamik milutsitsisaramik, ulluni 35-ni, ullormullu 350 gramminik piaraat oqamaallisarluni.
Soorlu natsersuit ulluni sisamaannarni milutsitsisarput ullormullu 7 kilonik piaraat oqimaallisarlutik. Tassa orsoq nukippassuillu piaqqanut tunniunneqartarput, piaqqanullu marlunnut taamatut uumatitsinissaq ajornartutut takorloorlugu Aqqalu Rosing-Asvid oqarpoq.
Tamakkulu peqqutaasinnaapput puisit marlulissat qaqutigoorluinnarnerannut Aqqalu Rosing-Asvid oqarpoq.
