Nerisassat pillugit podcasti: Puiseeqqanik suaasaliorneq ajorpugut
- Puisitortarnerput Danmarkimi ammut isigineqartarami, Christian Elsner oqarpoq. Taanna qatanngunnilu Frederik Elsner DR Ramasjang suleqatigalugu meeqqanut tulluartumik nutaamik erinniorpoq.
DR nutaamik podcastimik "Madpakken"-imik taallugu saqqummersitsivoq, tassanilu nerisassat pillugit erinnat 20-t saqqummersinneqarput. Ilaatigut danskeq tusaamasaq Sys Bjerre peqataalluni.
Qatanngutigiit Elsnerikkut erinniaat "Fangerkultur" oqariartuuteqarpoq. Tassani isummat pigiliutiinnakkat akiorniarpaat. Soorlu kalaallit puisiminertortarnerat danskinit akerlerineqartartoq, Christian Elsnerip oqaatigaa.
Ilaatigut assersuutigaa puulukit toqutaannginnerminni mattusimaneqartartut, akerlinganilli:
- Nunatsinni puisit immamiittarput kiffaanngissuseqarlutik taannartaa aamma ilanngukkusussimavarput pissutigalugu nunarput nuannernerusumik takutikkusukkatsigu, siammarterusukkatsigu.
Nersussuit aamma inequgineqarsinnaapput
Podcastimi eqqumiitsuliortoq Nukáka Coster-Waldau aamma peqataavoq. Taassuma meeqqamik oqaloqateqarluni nassuiarpaa puiseeqqanik suaasaliortoqarneq ajortoq. Oqaluussaatalu meeqqap akimmani puisit inequnartuusut, Nukákap akissutigaa aamma nersussuit puulukillu inequgineqarsinnaasut.
Qatanngutigiillu erinniartik paasineqarluarumaartoq neriuutigaat.
- Neriuppunga ingammik Danmarkimi paasisaqarnerulaassasut nunatsinni susoqartarnersoq aamma nunatsinnut isigeriaasaat allanngorsarusullugu.
Erinaq "Fangerkultur" Spotifymi akeqanngtsumik tusarnaarneqarsinnaavoq.