Puilasup ernga avammut nioqqutaalissaaq

Greenland Spring Water Aps-ip maannakkut akuersissutit tamaasa pigilereerpai, puilasullu ernga nunatsinneersoq erniinnaq nunani tamalaani tuniniarneqarsinnaanngorpoq.

Greenland Spring Water ApS marsip qaammataani 2006-imi Qorlortorsuarmi puilasup ernganik avammut nioqquteqarnissamut akuersissummik pivoq. Tamatuma kingorna suliffeqarfik avammut niuernerup aallartinnissaa siunertaralugu niuernissamut periarfissanik ukiuni pingasuni misissuinissamut periarfissinneqarpoq.

- Misissuinerit taakku takutippaat nunatta erngata tunisassiarinissaa nunani tamalaani tuniniaaffiusuni periarfissaqartoq, naalakkersuisuni ilaasortaq Siverth K. Heilmann oqarpoq.

Taanna isumaqarpoq Greenland Spring Water ApS-ip avammut nioqquteqarluni aallartinnissaa inuiaqatigiinnut iluaqutaassasoq aamma avataaniit pisiortornerup avammullu nioqquteqarnerup oqimaaqatigiinnerulernissaanut aqqutissiuusseqataassasoq.

Tamatuma saniatigut sinneqartooruteqarnermi agguaariaasissatut isumaqatigiissut suliffeqarfiup tunisassiorluni aallartinneranit ulluanit siullermiit Nunatta Karsianut immikkut iluanaarutaasussaavoq, aammalu Qeqertarsuarmi suliffinnik nutaanik pilersitsissalluni.

Greenland Spring Water ApS-ip naatsorsuutigaa sulisut nikittaattut marluk aallarniutiginiarlugit, siunissamili ungasinnerusumi sulisut nikittaattut pingasunngortinneqarnissaat neriuutigineqarluni.