Puilasumit imeq nunani allani ungasinngitsukkut tuniniarneqalissaaq
- Assigiinngitsutigut misinnartoqaqaaq, minnerunngitsumik Schweitziminngaanneersuulluni, Qeqertarsuarmi Greenland Spring Waterimi siulersunut siulittaasoq, Marc Zulian oqarpoq, nangillunilu:
- Kalaallit Nunaat kusanartorsuuvoq soorunalumi uanga maani kulturi eqqarsariartaaserlu ilinniartariaqarpakka. Taakkualu saniatigut Kalaallit Nunaanni suulluuniit akisunerujussuat silallu pissusaata ataqqisariaqarnera aamma sungiunniagassaapput. Assartuinermummi innaallagissamullu akit Europamiit qaffasinnerujussuupput. Silap pissusaa aamma sungiunniagaassaavoq, maannakkummi suli naluarput ukiumut qaammatini qassini tunisassiortarsinnaassanerluta, Marc Zulian oqarpoq.
Taamaammat Kalaallit Nunaanni tunisassiorfimmik aallartitsiniarnerat eqqumiiginarsinnaagaluartoq, Marc Zulian oqarpoq, Kalaallit Nunaanniit puilasumit erngup oqaluttuassartaa asseqanngitsoq, nunarsuatsinnilu puilasup ernganik tunisassiortorpassuaqaraluartoq, Kalaallit Nunaanni puilasumiit imeq minguinnerpaasoq. Namminerlu najukkaminiit allaassutaasunut ilaanerarpaa, inuit suliffimminnik tulluusimaaruteqartaramik suliarisaminnik pimoorussilluartarnerat. Taamatut Marc Zulian nassuiaavoq.
Greenland Spring Waterimi siulittaasoq aamma oqaluttuarpoq, pilersaarutit naapertorlugit juulip qiteqqunnerani tunisassiulersinnaassallutik, aggustillu 28-anni Kalaallit Nunaanniit, Schweitzimiit Danmarkimiillu inuit nuimasut tunisassiorfimmik ammaanersioqataassamaartut. Katja Nyborgip Marc Zulianimik apersuinera Ulf Fleischerimit kalaallisuunngortinneqarpoq.
