Puigortunngortup paaqqutarinera puigortunngortitsisinnaavoq
Peter Reventlow maanna angerlarsimaffimmini kisimiippoq, nulialu utoqqarnik paaqqinniffimmut nuussimalluni.
- Ukiut arfineq-marluk arfineq-pingasut matuma siornagut puigoqqajaalluni
paatsiveeruteqqajaallunilu aallartippoq, Peter Reventlow oqarpoq.
Tamatuma kinguninngua puigortunngorsimasoq paasineqarpoq. Tamanna annilaarnaqaaq, taamanikkumiillu suna tamarmi pitsanngoriartorsimanani.
Suliassat peqqissaaruttarissat ajornarnerusaraluarput, tamakkuali Peter Reventlowimut ukiuni kingullerni ajornakusoornarsimanatik. Tassa inuk maanna ukiuni 47-nngortuni inooqatigisimasaq kigaatsunnguamik peerukkiartortoq isigalugu tamanna ullormut eqqarsaatitigut nanertuutaasarpoq, Reventlow oqarpoq.
Nuliata puigortunngornermik nappaateqalernera napasinnaaneranut sunniuppoq, Peter Reventlowilu suliffimminit qasseeriarluni angerlartarsimavoq nuliilu ikiorsinnaajunnaarsimalluni natermi nalasoq siumortarlugu.
Naallu tamanna artornaraluartoq arajutsisimavaa aapparisap paaqqutarinera aamma puigortunngortitsisinnaammat. Paasivara nikallungassutaasinnaasoq aammalu nappaatinik inuunermi atukkanit tunngaveqartunik nappaateqartoqalersinnaasoq, tassami kisimiilluni inuugaanni allatut inuusariaqarmat, kisiannili tamanna tunillaassinnaanersoq paasillugu uannut nutaarluinnaavoq, Reventlow naggasiivoq.
Kasper Jørgensen sianiutinut immikkut paasisimasaliuvoq puigortunngortullu pillugit paasisanik katersivimmi siunnersortaalluni, taassumalu nassuiarpaa aapparisap napparsimasup paaqqutarinerani paaqqutarinnittup puigortunngorsinnaanera 50 procentimik annertunerulersartoq.
- Tamanna uissuumminarpoq, tassami siornatigut ilisimaneqanngimmat. Misissuinerit annikinnerusut takutippaat puigortunngortunut aappaasut eqqaamanninniarnerminni ajornartorsiuteqarnerusartut aammalu ajornartorsiutiminnik aaqqiiniarnertik paamaarunnerusarlugu. Tamakkuali misissuinerupput annikinnerusut sivikinnerusullu, taamaattumillu eqqaamannissinnaaneq ataavartumik sunnerneqartarnersoq ilisimaneqarani. Misissuinermilu tamatumani ukiuni aqqaneq-marlunni malittarineqartumi erserpoq aapparisat aamma puigortunngorsinnaasut.
Maanna peqqinnissaqarfiup angerlarsimaffiit sivisunerpaamik pigineqarsimasut innersuuppaat, tamanna qanigisaasunut misissuinermi tamatumani malittarisatsinnut aammalu akisunaarerujussuartunut isumannaatsuunersoq aperineqarami Kasper Jørgensen akivoq:
- Naagga, taamaassinnaanngilaq, isumaqanngilanga angerlarsimaffiit sivisuumik najukkat puigortunngortunut tamatigut pitsaasuusut, ilaannikkulli puigortunngortoq paaqqinniffimmut nuutinneqaraangat artukkerneqarneq ima atsigilersinnaalluni, tamanna piffissalersuinertut oqaatigisinnaasannik pissuteqarsinnaalerluni, Kasper Jørgensen naggasiivoq.
