Pualavallaaqimmat soraarsippaat

Arnaq pualavallaarnini pissutigalugu Danmarkimi suliffimminiit soraarsitaasimavoq. Arnaq 130 kiilunik oqimaassuseqarpoq, taamalu oqimaatsiginini pissutigalugu ullut sisamaannaat saaffiginnittarfimmi suliffittaamineereerluni soraarsitaavoq.

Arnap soraarsitaanera peqatigiiffianit kukkunerusorineqarpoq, taamaammallu eqqartuussivimmut ingerlatinneqarluni.

- Pisoq inatsisinik unioqqutitsinertut assigiinngisitsinertullu isigaarput, taamaammat eqqartuussivilersuussiniarpugut, HK-mi siulittaasup tullia, Mette Kindberg oqarpoq.

44-nik ukiulik, Mariane Steffensen, ullut sisamaannaat sulereerluni ittuminit soraarsitaanerminik allagarsigami uissuummeqaaq. Suna pissutigalugu soraarsitaanerluni itisileqqugamiuk paasitinneqarpoq, oqimaappallaarnini/pualavallaarnini pissutigalugu soraarsitaalluni, ataavartumillu allaffimmiunngorusukkuni sanigorsertariaqartoq.

Mariane Steffensen kukkunersiuisartup Per Jacobsenip nammineerluni toqqarsimavaa atorfinitsillugulu, taamaakkaluartorli soraarsitaanera aamma akisussaafigalugu.

- Soraarsitsissanerlunga soraarsitsissannginnerlungaluunniit nammineq akisussaaffigaara, isumaqanngilangalu eqqunngitsuliorsimallunga, ajunngisaarfigaaralu sooq soraarsitaanersoq itisilerakku, Per Jacobsen aviisimut BT-mut oqarpoq.