Præsidentiusimasoq pinngitsaaliisimasutut pisuutitaavoq
Katsav 2000-imit 2007-imut præsidentiusoq, marloriarluni pinngitsaaliilluni arnerisimasutut, pinaasersumut arneriniarsimasutut aamma atoqatigiinnermut tunngasunik kanngutsaatsuliorsimasutut, minnerpaamik ukiuni arfineq pingasuni parnaarussassanngortitaariaannaavoq.
Katsav unnerluutiginninnernut allanut eqqartuussivimmit aamma pisuutitaavoq aamma eqqartuussivimmut suliassanngortitsisunik mamarliisimasutut misissuinermilu akornusersuiniarsimasutut isornartorsiorneqarluni.
Israelimiut præsidenterisimasaanut aatsaat taama sakkortutigisumik pineqaatissiisoqarpoq, aamma eqqartuussinerup ingerlanneqarnera pineqaatissiinerlu Israelimi oqallisigineqaqaat.
Israelimi præsidenti naalakkersuinikkut pissaanilimmik inissisimanngilaq. Taamaattorli maanna præsidentiusup ileqqorissaarnissaq inuiaallu ataatsimoornissaat erseqqissassagaa naatsorsuutigineqarpoq.
Katsav qinigaaffini suli qaangiutinngitsoq unnerluutiginnittunit tunuartitaavoq. Pineqaatissinneqarnini eqqartuussivimmi qulliunerusunut ingerlateqqissagaa naatsorsuutigineqarpoq, taamaattorli Israelimi tusagassiuutit suliap sivisuumik ingerlanneqarnissaa ilimagaat, Israelimilu eqqartuussiviit qullersaanut apuunneqarnissaa naatsorsuutigineqarluni.
